Sevói, tomate ha zanahoria oñemondóma Argentina-pe

Agencia IP.- Viernes ohasávape, 28.800 kilo sevói oñemondo kuri Argentina-pe. Ko’ã oñemono’õ kuri Boquerón-pe. Avei, oñemondóma tomate ha zanahoria.

Kóva ha’e tuicha mba’e, ha ojeguerovy’a peteĩ aty guasúpe Boreal Puerto Seco-pe, hi’aguĩva tetã ñande ykéregua rembe’ýgui. Upépe, oho kuri motenondehára Agricultura ha Ganadería rehegua, Carlos Giménez; Senave mburuvicha, Pastor Soria Melo; ha ambue tendota ñane retã rehegua. Upéicha, oĩ avei umi ñemitỹhára Paraguái rehegua ha umi ojoguáva Argentina-pe.

Pe carga-pe, oho 1.600 vosa orekóva 18 kílo peteĩteĩ, ha’éva ñemitỹhára Gian Hiebert mba’e, hendaha Picada 500 táva Mcal. Estigarribia-pe.

Mburuvicha Senave-gua, Pastor Soria, he’i kuri umi producción ñane retã rehegua oho ambue tetãme ha’eha peteĩ mba’e ojejaposetévama voi, ha ohechaukáva umi tapicha oikóva Chákope ha ñane retãme ikyre’ỹva. Avei, omombe’u oimeraẽ jave oñemondótama lokóte ambue tetãme.

Motenondehára Agricultura ha Ganadería rehegua, Carlos Giménez, he’i kuri oñemondo ramo ñane mba’e ambue tetãme oñedescomprimi mercado local, ha omomba’eguasu ojeporeka hína hikuái mercado pyahu oñemondo hag̃ua Paraguái mba’e.

Ñemitỹhára Gian Hiebert ome’ẽ hiaguyje umi institución oipytyvõva kuri chupe, ha he’i oñeñadu porã omondo haguére imba’ekuéra ambue tetãme, ha oha’arõ omondo jey ambue mba’e. «Kóva ha’e peteĩ mba’e che ha che rogaygua rovy’a hag̃ua, romomba’e pe voluntad orekóva umi omboguatáva oréve ha tuicha mba’e ñane retãme g̃uarã avei», omohu’ã ko nemitỹhára orekóva 70 hectárea producción Cháko Paraguáipe.